Job 9

Impendulo kaJobe

1 Wasephendula uJobe wathi:

2 “Ngeqiniso ngiyazi ukuthi lokhu kuliqiniso. Kodwa umuntu wenyama angalunga yini kuNkulunkulu?

3 Loba umuntu ubengafisa ukuphikisana laye ngeke amphendule lakanye emibuzweni eyinkulungwane.

4 Ukuhlakanipha kwakhe kujulile, amandla akhe makhulu. Ngubani kambe oke wamelana laye wasinda?

5 Uyazisudula izintaba zona zingazi lutho, azigenqule nxa esezondile.

6 Uyawunyikinya umhlaba endaweni yawo, axukuxe izinsika zawo.

7 Uyalitshela ilanga ukuba lingakhanyi; asibekele ukukhanya kwezinkanyezi.

8 Nguye kuphela owelula amazulu, ohamba phezu kwamagagasi olwandle.

9 UnguMenzi wezinkanyezi iNgulube leZinja, iSilimela loMthala waseningizimu.

10 Wenza imimangaliso engafinyelelekiyo, izimanga ezingelakubalwa.

11 Uthi nxa esedlula kimi, ngingamboni; ahambe khonapho ngingezwa lutho.

12 Uma ehluthuna, ngubani ongamalela? Ngubani ongathi kuye, ‘Wenzani wena?’

13 UNkulunkulu kalunqandi ulaka lwakhe; labasekeli bakaRahabi besaba bawela ezinyaweni zakhe.

14 “Pho mina ngingaphikisana laye njani? Ngingawathatha ngaphi amazwi okuphoselana laye?

15 Lokuba ngiyabe ngingelamlandu, ngeke ngimphendule; Ngiyala ngokumncenga uMahluleli wami ukuthi angihawukele.

16 Lokuba bengingambiza laye eze, angikholwa ukuthi ube engangilalela.

17 Ubengangihlifiza ngesiphepho andise amanxeba ami kungelasizatho.

18 Ubengasoze angiphe ithuba lokukhokha umoya kodwa ubezahle angicindezele ngosizi.

19 Nxa kutshiwo amandla, awakhe angakaya! nxa kumbe yikwahlulela okuhle, ngubani ongamthonisisa?

20 Loba ngingabe ngingelacala, umlomo wami ubungangilahla; aluba ngimsulwa wona uthi ngonile.

21 “Lokuba ngingelacala, angizihluphi ngami; ngiyayeyisa impilo yami.

22 Kuyafanana konke; yikho ngisithi, ‘Ubhubhisa bonke abangelacala lababi.’

23 Nxa isifo esibi sibulala ngokuphangisa, uyabahleka abangelacala ngokulahla kwabo ithemba.

24 Nxa ilizwe liwela ezandleni zababi, ubembesa amehlo abehluleli balo. Nxa kungayisuye, pho ngubani?

25 “Amalanga ami alesiqubu esidlula esomgijimi; ayaphapha anyamalale kungekho kuthokoza.

26 Antweza edlule njengezikepe zelala, njengezingqungqulu zisehla zihwitha ezikudlayo.

27 Aluba ngingathi, ‘Ngizakubeka eceleni ukusola kwami, ngicitshe ukunyukubala ngibobotheke,’

28 ngijinge ngilokhu ngihemahema ngezinhlupho zami, ngokuba ngiyazi ukuthi kawuzukungigeza.

29 Njengoba ngivele sengibekwe icala, ngizazihluphelani ngokulwela ize na?

30 Loba ngingaze ngigeze ngesepa lezandla zami ngesoda yokugeza,

31 uzajinge ungiphosele emgodini olodaka ngize ngenyanywe yizigqoko zami.

32 Akasumuntu njengami ukuthi ngingamphendula, ukuthi singamisana emthethwandaba.

33 Aluba ube engabakhona osilamulayo, abeke isandla sakhe phezu kwethu sobabili,

34 omunye nje ongasusa uswazi lukaNkulunkulu kimi, ukuze ngingatshukunyiswa yilokhukwesaba.

35 Lapho-ke bengizakhuluma ngingesabi yena, kodwa okwakhathesi kunje, ngeke.